你若係焗腦工人(客語版)

你若係焗腦工人

P3：頭擺，樟腦油係賽璐珞、醫藥、香水….个重要原料，用途當闊、價數當高。頭擺，臺灣樟腦油个產量係世界第一，分人安到「樟腦王國」。

你若係焗腦工人，你个產品可能出現在世界各國

P4：頭擺，樟腦油開發採收都集中在台灣北部，後來慢慢遷徙到中部地區來，臺灣个樟腦產業大部分係客家人所做个產業，台灣客家人个分布摎樟腦開發採收有關係。

你若係焗腦工人，你異有可能係客家人。

P7：因為做樟腦油个開採个事業，客家人順等有樟樹林个所在遷徙，就出現了像南庄、北埔這兜由客家人集中變成个沿山鄉、鎮，故所，也有異多客家人係恁樣來到國姓地區。

你若係焗腦工人，你可能識跈等其他个工人徙入山肚待。

P8：因為開採樟腦油，一定愛行入到原住民待个山林，開採焗樟腦油个漢人時常摎原住民發生衝突，故所，隘墾寮、隘勇線也就慢慢仔出現。

你若係焗腦工人，你可能識摎原住民相劚過。

P11：在日本管理時代，愛做一个焗腦工人，一定愛經過考試，有法度用鼻个方法來分出樟樹个種類个人，佢正有法度拿到「腦丁」牌。腦丁个收入比做農个人較好，還做得毋使做兵。

你若係焗腦工人，你一定愛有一個做得分出本樟、香樟、牛樟，這兜都係無共樣樟樹个好鼻公。

P13：提煉樟腦油个過程相當辛苦，愛用異多人工摎使作，不同个情形下用不同个鋸仔摎斧頭，徙動樹仔个翻勾摎鶴嘴撬，刨柴屑用个鋒仔、裝樟腦油个滴桶摎背籠……，都係焗腦時常用著个使作。

你若係焗腦工人，你可能會用到異多當利个使作。

P14：倒下來个樟樹愛先刨做幼屑，正做得拿來提煉。做得焗樟腦油个樟樹，愛有五、六十年以上个大樹，因為樟腦產業發達，故所臺灣个大樟樹林快速消失。

你若係焗腦工人，你可能識在森林肚倒過比自家年紀較大个老樟樹。

P16：刨好个樟樹幼屑，愛放入樟腦个腦灶肚个炊仔肚炊，在這過程當中，控制火摎水都係當重要个工作。

你若係焗腦工人，你一定愛曉得控制火摎水，還愛耐得熱。

P19：煞忙个客家人在開發採收樟腦以外，會在當地種作其他个經濟作物，也有當多人就定居下來，故所，樟腦个開採史做得講係內山个開發史。

你若係焗腦工人，你可能還會種禾仔、甘蔗等其他个副業。

1980年代後期，用樟樹提煉个樟腦分化學做成个樟腦替換忒，臺灣个樟腦產業就漸漸仔歿落，焗腦工人个生活會有麼个變化呢？